There are no articles in this category. If subcategories display on this page, they may have articles.

Subcategories

ཞལ་འདོན་ཆོས་སྤྱོད།

གནས་སྐབས་མངོན་མཐོ་ལྷ་མི་དང་མཐར་ཐུག་ངེས་ལེགས་ཐར་པ་དང་ཐམས་ཅད་མཁྱེན་པའི་གོ་འཕང་ནི་ཀུན་གྱི་མངོན་འདོད་གཙོ་བོ་ཡིན་ལ། དེ་ཡང་ཚོགས་གསོག་སྒྲིབ་སྦྱོང་གནད་སྨིན་དུ་སོང་མིན་ལ་རག་ལས་པར་བརྟེན། དད་ལྡན་གང་ཞིག་གིས་རྒྱལ་བའི་གསུང་རབ་ཀློག་འདོན་སོགས་དང་། ཡི་དམ་རྒྱུད་སྡེ་བཞིའི་སྒྲུབ་སྐོར་དང་། ཆོས་སྲུང་ཁག་ལ་བརྟེན་པའི་ཞི་སོགས་ཀྱི་རབ་འབྱམས་སྒྲུབ་ཆོག །གཞན་ཡང་བླ་མའི་སྐུ་ཚེ་ཚེ་སྒྲུབ་དང་ཞབས་བརྟན། རང་གི་རྐྱེན་སེལ་ཞབས་རིམ་སོགས་སྒྲུབ་སྐབས་ཉེ་བར་མཁོ་བའི་ཆོ་ག་དང་ཆོས་སྤྱོད་རྒྱས་བསྡུས་སྣ་ཚོགས་ཤིག་ཡོད་པ་ལས། འདིར་ནི་དཔལ་ལྡན་སྟོད་རྒྱུད་གྲྭ་ཚང་གི་མཐོང་བ་བརྒྱུད་པའི་ཕྱག་བཞེས་ལྟར་གྱི་འདོན་ཆོག་གི་རིགས་གང་འོས་རིམ་བཞིན་འགོད་སྤེལ་ཞུ་འཆར་མཆིས།

དཀྱིལ་འཁོར།

དཀྱིལ་འཁོར་གྱི་སྐད་དོད་མཎྜལ་ཞེས་པ་ནི་སྙིང་པོ་འཛིན་པའམ་སྙིང་པོ་ལེན་པ་ལ་གོ་བས།  གསང་སྔགས་ཟབ་མོར་དད་མོས་ལྡན་པའི་གང་ཟག་གང་གིས་ལམ་ཐུན་མོང་བས་རྒྱུད་ལེགས་པར་སྦྱངས་ཏེ་མཚན་ཉིད་དང་ལྡན་པའི་རྡོ་རྗེ་སློབ་དཔོན་ལས་དབང་བཞི་རྣམ་པར་དག་པ་ཐོབ་ཅིང་། དམ་ཚིག་དང་སྡོམ་པ་ཚུལ་བཞིན་དུ་བསྲུངས་ཏེ། རྟེན་གཞལ་ཡས་ཁང་གི་གཙོ་བོ་ཡི་དམ་དང་དེའི་འཁོར་དང་བཅས་པ་ཚུལ་བཞིན་དུ་བསྙེན་ཅིང་བསྒྲུབས་ཏེ་སྙིང་པོ་དམ་པ་མཆོག་དང་ཐུན་མོང་གི་དངོས་གྲུབ་ལེན་པ་གོ་བ་ཡིན། དེ་ལ་རྡུལ་ཚོན་དང་རས་བྲིས་སོགས་ཀྱི་དབྱེ་ངོ་མང་ཞིང་། དེ་ཉིད་འབྲི་བཞེངས་དང་མཐོང་ཐོས་རེག་གསུམ་བྱས་པ་ཙམ་གྱིས་སྡིག་པ་ཀུན་ལས་རྣམ་པར་གྲོལ་བའི་ཕན་ཡོན་མཐའ་ཡས་པར་གསུངས་སོ།། དེས་ན་སྐབས་འདིར་བདག་ཉིད་འཇུག་ཅིང་དབང་ལེན་པ་དང་གཞན་ལ་དབང་བསྐུར་བ་སོགས་ཀྱི་སྐབས་སུ་ཉེ་བར་མཁོ་བའི་ཡི་དམ་གསང་བདེ་འཇིགས་གསུམ་སོགས་རྒྱུད་སྡེ་ཁག་གི་རས་བྲིས་ཀྱི་དཀྱིལ་འཁོར་དང་། དེ་བཞིན་ལས་བཞིའི་ཐབ་ཐིག །གཏོར་ཐིག །མཆོད་རྟེན་གྱི་ཐིག་སོགས་རིམ་བཞིན་འགོད་སྤེལ་ཞུ་འཆར་ལགས།

མཆོད་གཏོར།

སྤྱིར་མཆོད་གཏོར་ནི་རྣམ་གྲོལ་དོན་གཉེར་ཅན་དག་གི་ཚོགས་གསོག་སྒྲིབ་སྦྱོང་གི་ཆེད་དུ་སྐྱབས་ཡུལ་ཁྱད་པར་ཅན་དག་ལ་འབུལ་རྒྱུའི་མཆོད་རྫས་ཤིག་ཡིན། དེ་ལ་ཡང་དངོས་སུ་བཤམས་པ་དང་ཡིད་ཀྱིས་སྤྲུལ་པ་གཉིས་ལས། དངོས་སུ་བཤམས་པའི་མཆོད་གཏོར་ལ་ཞི་སོགས་ལས་རབ་འབྱམས་སོ་སོའི་མཆོད་གཏོར་དང་། ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་གཏོར། ཡིད་ཀྱིས་སྤྲུལ་པ་ལ་ཡང་དེ་བཞིན་ཡོད། ཕྱིའི་མཆོད་གཏོར་ལ་མཚོན་ན། ཕྱག་རྡོར་གོས་སྔོན་ཅན་གྱི་ཆོ་ག་ལས། རྩ་བ་ལྔ་དང་ཡན་ལག་ལྔ།། འབྲུ་དང་ཤིང་ཏོག་སྨན་རྣམས་དང་།། ཆག་ཐུག་ཁུར་བ་ལ་སོགས་པ། ཞེས་པ་ནས། དེ་དག་ཐམས་ཅད་ཕྱིའི་ཡིན་ནོ།། ཞེས་གསུངས་པ་ལྟར་རོ།། མདོར་བསྡུས་ན་མཆོད་གཏོར་ལ། བླ་མ་དང་ཡི་དམ། ཆོས་སྐྱོང་། བགེགས་དང་འབྱུང་པོ་སོགས་འདས་མ་འདས་ཀྱི་མགྲོན་སོ་སོར་འབུལ་རྒྱུའི་མཆོད་རྫས་ཤིག་ཡིན། དེ་ལ་ཡང་དབྱིབས་དང་ཁ་དོག་སོགས་རྣམ་གྲངས་མི་འདྲ་བ་དང་། དེ་བཞིན་དུ་ཕྱག་བཞེས་མི་འདྲ་བ་སྣ་ཚོགས་ཡོད། འདིར་ནི་གྲྭ་ཚང་གི་རྒྱུན་ལྡན་མཐོང་བ་བརྒྱུད་པའི་ཕྱག་བཞེས་ལྟར་གྱི་ཡི་དམ་གསང་བདེ་འཇིགས་གསུམ་སོགས་ཀྱི་མཆོད་གཏོར་རྣམས་རིམ་བཞིན་དགོད་རྒྱུ་ཡིན།