༄༅།། དཔེ་མཛོད་ཀྱི་གལ་ཆེའི་དགོས་དམིགས་གཞིར་བཟུང་སྟེ་རིས་མེད་མཁས་གྲུབ་དག་གི་གསུམ་འབུམ་དང་བརྩམས་ཆོས། རྒྱལ་རབས་ལོ་རྒྱུས་དང་ཆོས་འབྱུང་མཛད་རྣམ། ཐ་སྙད་རིག་གནས་སོགས། མདོར་ན་སྐད་ཡིག་འདྲ་མིན་ལས་གྲུབ་པའི་ཐུན་མོང་དང་ཐུན་མིན་གྱི་ལྟ་གྲུབ་རིག་གནས་སྣ་ཚོགས་འཁོད་པའི་ཡིག་ཆ་ཁྲི་ཕྲག་ལས་རྒལ་བ་མཁོ་སྒྲུབ་ཞུས་དང་ཞུ་བཞིན་པའི་ཁོངས་ནས། ཕྱི་ལོ་ ༢༠༡༩ ཟླ་༦ ཚེས་ ༢༠ ཉིན་ཀྲུང་གོའི་བོད་རིག་པ་དཔེ་སྐྲུན་ཁང་གིས་པར་སྐྲུན་ཞུས་པའི་༸པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ། མདོ་སྔགས་རིག་གནས་ཀྱི་ཆ་ལག་མ་ཚང་བ་མེད་པར་པོད་གྲངས་སུམ་ཅུ་སོ་དགུ་ཐམ་པ་བླུ་ཡོན་ཞུས་པའི་ཁོངས་ནས། སྐུ་ཕྲེང་དང་པོ་མཁས་གྲུབ་ཐམས་ཅད་མཁྱེན་པའི་གསུང་རབ་དག་ནི་རྗེ་ཡབ་སྲས་གསུམ་གྱི་གསུང་འབུམ་གྱི་ཁོངས་སུ་ཕྱོགས་གང་ས་ནས་དཔར་སྐྲུན་ཞུས་དང་ཞུ་བཞིན་པ་ཡིན་པས། ད་ལན་འདིའི་ཁོངས་སུ་དཔར་དུ་མ་བསྐྲུན་ཅིང་། སྐུ་ཕྲེང་གཉིས་པ་བསོད་ནམས་ཕྱོགས་གླང་གི་གསུང་འབུམ་ནི་ཞུ་སྒྲིག་པ་དག་ལ་མ་ཕྱི་ཕྱག་སོན་མ་བྱུང་ཚུལ་གསལ། དེ་མིན་སྐུ་ཕྲེང་གསུམ་པ་རྒྱལ་བ་དབེན་ས་པ་བློ་བཟང་དོན་གྲུབ་ནས་བཟུང་སྐུ་ཕྲེང་བཅུ་པ་བློ་བཟང་ཆོས་ཀྱི་རྒྱལ་མཚན་གྱི་བར་གསུང་འབུམ་ཆ་ཚང་བླུ་ཡོན་ཞུས་ཡོད།
